بوست للتوثيق :
أمس كانت نهاية المرحلة الثانية من حياتي
الحمد لله على ما انتهت إليه
الحمد لله على كل ما يعطي
=============

المرحلة الأولى : من المولد حتى 18 مايو 2014 >> مرحلة فشلت واستغنيت عنها بالكامل ولا أذكرها في حياتي.

مرحلة انتقالية : من 19 مايو 2014 حتى 10 يناير 2015 : كنت بحاول أشوف أقدر ابدأ حياة جديدة ازاي


=============
المرحة الثانية : من 10 يناير 2015 حتى الأمس (6 يونيو 2018)
كانت حياة جميلة مليانة (مذاكرة وعلاقات وعمل ومهارات وأخلاق وأصحاب وإخوة وغير ذلك الكثير)













سمات التزمت بها في المرحلة الثانية:

* التوتر الدائم : بسبب الامتحانات المستمرة والاهتمام بالكثير من الأشياء معًا

* ضعف التركيز وضعف الاستيعاب : بسبب التوتر الدائم اللي أثر على صحتي بمختلف أشكال الصحة


* الوَسَع : غالبًا ما قلتش لا لأي طلب اتطلب مني طالما في متسعي اعمله (ما كانش عندي حاجة اسمها مزاج - فاضي أو متاح أو أقدر يبقى يلا بينا)

* الصدق : تقريبًا ما كذبتش كذبة واحدة في هذه المرحلة

* المذاكرة : تقريبًا كانت السمة الظاهرة بوضوح وأثرت على حاجات كتير بالسلب وأكيد كانت سبب في فرح بردو (يعني كانت سلاح ذو حدين)


* قلة السؤال والتقصير: تقريبًا كنت مقصر مع الله وعائلتي وأصحابي وعلاقات مهمة ومع نفسي في هذه المرحلة بسبب ضغط الكلية أو ضغط الشغل

* الضغط المستمر: تقريبًا المرحلة من أولها لآخرها لم يكن فيها أسبوع كامل من الفراغ ... كنت ببقى في المصيف وبعمل شغل ساعات والله .. وفي مصيف ما كملتوش أو كملته بس كان مصيف قصير بسبب الشغل - قلة الفراغ كان شيء مسيطر على المرحلة

* ما قلتش كلمة حب نهائي (غير لأشخاص استثنائيين)

يعني حرف ال ح و ال ب لم يتصلوا مع بعض (أبدًا) قدام حد ...
لا (حبيبي - حب - أحبك - أحبك في الله - بحبك - بحب كذا)
(كان هناك استثناءات)
ده كان شرطي لإكمال حياتي بعد المرحلة الأولى السيئة - كنت لا أشعر بالحب تجاه أقرب الناس فكان عهد على نفسي ما أقولش لحد أبعد منهم إني بحبه ... فالتزمت إني ما أقولش الكلمة
انا في المرحلة القادمة أكيد هستغنى عن الشرط ده لأنه صعب جدًا
كنت بعوض عن كلمة حب ... ب (بعزك - باحترمك - بافضل الشيء الفلاني) وهكذا

* الصلاة في المنزل - بسبب الانشغال

* نسيان القرآن - بسبب الانشغال

* غيره من التقصير مع ربنا اللي أكيد هغيره في المرحلة القادمة

* ندرةالألفاظ السيئة - قليل جدًا جدًا التلفظ بشيء - حتى في الهزار والعصبية - وكنت بعوض ده إما بالذكر أو بالإيحاءات أو بترك المكان - وكنت مش بحتاج الألفاظ السيئة في حاجة غالبًا

* الضعف - ضعف في قوة البدن - ضعف في التركيز - ضعف في العزيمة - ضعف قصاد الدكاترة والامتحانات - ضعف قصاد الذنوب والمعاصي
وكان سبب الضعف هو الضعفوفات الأخرى
يعني لما بحب أربي نفسي كنت مثلاً أصوم لفترة أو أكلف نفسي بشيء مرهق ... لكن بسبب ضعفي قصاد الامتحانات والمذاكرة أصبحت بريح نفسي ع الآخر حتى لو انا المفروض أعاقب نفسي - فكان بسبب إني أريح نفسي جسمي تعود على الراحة وبقيت مش بمارس رياضة وده أثر على البدن بشدة وعلى التركيز (لهم علاقة طبيعة ببعض)
وهكذا

* القوة - قوة في تحمل المسئولية - في الالتزام بالمبادئي اللي قلتها فوق - في المذاكرة - في المهارات - في الالتزام بالقوانين المفروضة عليا - في تحمل الصعاب بعضًا ما وتحمل الملل والآلام

* مشاكل صحية : مشاكل في ظهري والرقبة بسبب المذاكرة - قصور في بعض المستويات البيولوجية بسبب التوتر - ضعف عام - مشاكل جراحية بسيطة إن شاء الله وغيره

======

العلاقات:
- معظم العلاقات كان تطورها للأفضل الحمد لله
تعرفت على مجموعة من البشر (أصحاب - دكاترة - زملاء دراسة - زملاء عمل) أعجز على شكر ربي عليهم. هعمل لهم بوست خاص فيه معظم الأسماء
- في علاقات لم تتطور للأفضل ... لكن فعلاً كان من أجلهم والله - لو حسيت إني مش هفيدك بل هضرك أو هحرمك من شيء أو هخليك تضحي فبفضل ساعتها إني أبعد من أجلك تقدر انت ساعتها تشغل مكاني بحد أفضل يفيدك أو ما يضركش أو ما يخلكش تضحي
======
مفيش في بالي حاجة تاني دلوقتي ممكن أوثقها
لو في حاجة هكملها في الموضوع الأصلي في منتداي (هنا يعني)
======

أنا الآن في مرحلة انتقالية بين المرحلة الثانية والثالثة
هبدأ أحدد لنفسي أين أنا ذاهب ... هختار مبادئ جديدة وشعار جديد وأي حاجة (وأكيد هيكونوا مشابهين أو نفس اللي كانوا في المرحلة التانية لأني مش ندمان عليها أبدًا) ... أتمنى من الله التوفيق والسداد وحسن التدبير
ده معناه إني خلاص مش هلتزم بمادئ المرحلة التانية
البوست كله بهدف إعلان لنفسي إني مش هلتزم بمبادئ المرحلة التانية
واعتذار لكل اللي قصرت معاهم
وتوضيح لبعض المواقف اللي ممكن تكون غريبة